Nevoja për një menaxhim më të mirë të sportit dhe organizatave sportive, ka orientuar Komitetin Olimpik Ndërkombëtar (IOC) në krijimin e programeve të ndryshme për trajnimin dhe kualifikimin e burimeve njerëzore. Një ndër këto programe është “Kursi i Avancuar për Menaxhimin Sportiv” i cili i është deleguar Komiteteteve Olimpike në të gjithë botën për ta realizuar atë në gjuhët Anglisht, Frengjisht dhe Spanjisht. Kurrikula e këtij kursi është e hartuar dhe mirë përcaktuar nga ekspertët më të mirë të fushës së Menaxhimit Sportiv.
Por për të zhvilluar një kurs të tillë, Solidariteti Olimpik kualifikon dhe licenson Drejtorët e Programeve për cdo shtet. Modeli i zbatimit të këtij kursi në Shqipëri ka lënë gjurmë pranë Solidaritetit Olimpik. Në trajnimin e zhvilluar për Drejtorë Programi të ASMC për vendet Frankofone (CAMS), në fillim të muajit Shkurt, në Lozanë të Zvicrës, Solidariteti Olimpik ka ftuar z. Stavri Bello (njëkohësisht Drejtor Programi i ASMC për Shqipërinë) për tu bërë pjesë e trupës trajnuese për Drejtorët të rinj.
Për Komitetin Olimpik Kombëtar Shqiptar, përfaqësimi i z. Bello në këtë nivel, është një nder dhe privilegj që jo vetëm të përfaqësohemi në Lëvizjen Olimpike Botërore, por gjithashtu të jemi kontribues në këtë Lëvizje.
